Rinibribo manen ti bilang dagiti agtutubo a nagturpos iti 4-year-college courses ken two-year-vocational courses ditoy luglugartayo. Dagiti appo a nagannak ti napalaus iti ragsakda ta numan pay kasano ti rigat iti panagbiag ken naisakadda ti panagpabasa kadagiti annakda.
Arapaap iti maysa nga ina ken ama a maikkan ti naan-anay nga edukasyon dagiti annak ta iti adal ibilangda nga isu’t kakapatgan a gameng a di pulos mapukaw iti unos ti panagbiag iti maysa a tao.
Kalpasan ti graduasyon, sumaruno ti panagsapul iti trabaho a maitutop iti inturpos a kurso da Baro ken Balasang. No mabalbalin, awan koma ti sadot ken istambay. Agkudkod la ketdi iti ulo da ama ken ina, no makitada ti graduado nga anakda nga agil-ilad laeng a di met agkuti nga agsapul ti panggedanna.
Haanen a parikut ti agsapul iti trabaho no ti maysa nga aplikante ket graduado iti kolehio wenno vocational. Napintas a damag ta adu dagiti Job Fairs nga isayangkat ti Rehion Uno-DOLE (Department of Labor and Employment) ditoy nagduduma a paset iti Ilocos manipud ita Abril agingga’t Junio. No dakayo ket taga-Ilocos Norte, ag-apply kayo iti trabaho, lokal wenno abroad, idiay Job Fair a maangay inton Mayo Uno dita Robinsons Mall, San Nicolas, Ilocos Norte.
Adtoy ti Website iti DOLE-1: www.ro 1.dole.gov.ph wenno ti Facebook account: Dole Ilocos Region.#
