Di mailibak nga agraira ti panagtatakaw kadagiti pagtaengan ita agdama a bulan iti Desiembre–tiempo iti Paskua. Segun ti report iti polisia ditoy Ilocos Norte, agsasaruno dagiti kaso iti panagtatakaw.
Agduduma ti estilo dagiti birkog. Adda dagiti puersado a panagserrek kadagiti balbalay. Adda dagiti birkog nga agusar ti kallawit nga idalanda ti tawa. Sungkitenda dagiti napapateg a sanikua bayat a nairot ti turog dagiti bumalay. Armado dagitoy a birkog ti paltog wenno immuko. Inkaso a makapuot dagiti bumalay ket adda panagresister, di maliklikan ti trahedia. Dagiti birkog, kapilitan nga usarenda ti armasda iti kanito a malipitda.
Sumagmamanon a kaso ti panagdangran iti inaramid dagiti birkog basar ti report iti polisia ditoy Ilocos Norte ti naglablabas a bulan. Ditay masigurado no addan natiltiliw ken nadusa a birkog mainaig kadagitoy a panagtatakaw. No addan, saludo kami iti PNP.
Adu pay a klase ti panagbirkog ti mapaspasamak itatta a tiempo iti Paskua. Bisekleta wenno motorsiklo, di pakawanen dagiti mannibrong. Uray no naiyaponen dagitoy iti uneg ti biranda wenno garahe, agpukawda a kasla asug. No sumalog met dagiti mannipdot, bi bumorong nga agpiesta dagitoy a parsua nga addaan ti naalikuteg a ramramay. Dagiti budol-budol gang, natadem ti matada kadagiti appo a babbaket a nalakada laeng a maallilaw ti nasam-it a sarsarita dagiti natarabit a dila.
Panagridridam ken kina-alerto ti kasapulan tapno haan nga agballigi dagiti dakes nga aktibidades iti kagimongan.#
