Narway a dependents dagiti OFWs (Overseas Filipino Workers) a kamkameng iti OWWA (Overseas Workers Welfare Administration) ti naupay a nagawid kadagiti balbalayda kalpasan a saanda nakaala piman ti tulong pinansial manipud ti nasao nga OWWA bayat ti panagturongda dita Kapitolyo Probinsial, Laoag City idi Lunes, Nob. 7, 2016.
Nausar laeng ti espasyo iti Kapitolyo a kas lugar iti transaction. Ti OWWA, sanga iti gobierno nasional, iti akin-aktibidades kadaytoy a gannuat.
No apay nga adut nadismaya ket gapu ta nagkamtud ti pondo iti OWWA regional office nga immay ditoy Laoag tapno agibunong ti tulong pinansial kadagiti kualipikado a pamilia wenno dependents dagiti OFWs a miembros iti OWWA a nagsagaba iti didigra a pinarnuay ni Bagyo Lawin itay nabiit.
Segun ti report, makaawat ti P3,000 cash ti maysa a pamilia wenno direct dependent iti active OFW ken P1,500 iti inactive OFW. Nagasat dagiti immuna nga aplikantes ta nakaaladan ti tulong pinansial nga agdagup ti nasurok nga 800 a kata-o.
Ti makadakes, naibusen ti pondo iti OWWA para ti Cash Relief Assistance Care a programana para kadagiti biktima iti Bagyo Lawin ditoy Ilocos Norte.
Ni mismo a Director Marivic Mondina iti OWWA Region I ti nagkuna a Tallo Milyon a Pisos (P3 million) ti nailatang para ti rehion ngem nagkurang gapu ti adu a benepisaryo nga agkalikagum a makaala ti tulong pinansial manipud ti OWWA.
Sapay koma ta mangiparuk-at pay ti OWWA sentral ti nayon a pondo para ti Rehion Uno, partikular ti Ilocos Norte tapno sapasap a matulongan dagiti pamilia dagiti OFWs a nadidigraan ti kalamidad.
Rumbeng laeng nga agsubad ti gobierno kadagiti OFWs agsipud ta isuda ti mabigbig a kadakelan a kontributor iti dollar remittances a minil-milyon a sumsumrek iti pagiliantayo.#
