Adda kadi colorum a PUVs ditoy Norte?

Inadmitir ni Laoag district officer Hipolito Arde ti Land Transportation Office (LTO) nga awan ti enforcement unit iti opisinada a mang-monitor ken mangtiliw kadagiti masuspetsa a kulorum a passenger mini-buses ken public utility vehicle (PUV) vans nga addaan ti rota nga Laoag agpa-Amianan, vice versa.

Pasig kano nga administrative work laeng ti akem a naipakumit kadakuada ditoy Laoag LTO district office. Kayatna a sawen, naka-sentro ti inaldaw-aldaw a trabahoda iti uneg ti opisinada a mangtaming kadagiti ag-rehistro/ag-renew ti papeles dagiti luglugan, mangasikaso kadagiti agaplikar/ag-renew ti driver’s licenses ken dadduma pay.

Ti kano LTO regional office ti addaan ti enforcement unit. Nalabit isu daytay kunkunada a LTO Flying Squad. Nalawa ti sakopda iti Ilocos Region. Isu a manmano laeng a gundaway nga agoperarda ditoy Ilocos Norte. No agpayso nga adda dagiti kulorum a PUVs, masapul nga agkuti dagiti maseknan nga ahensia ti gobierno tapno matubngar daytoy nga illegal nga aramid.

Ngamin no kas pagarigan madisgrasia ti maysa a kulorum a PUV, awan ti accident insurance benefits a ma-claim dagiti siasinno man a biktima a pasaheros a nakalugan iti nasa-o a PUV. Isu nga no colorum kunatayo, illegal –awan surok awan kurangna. Iti ababa a panna-o, adu’t nalabsingna a paglintegan ti gobierno.#