Adda kad naikali a balitok idiay Masintoc?

Nabuak dagiti kaprobinsyaan tayo ditoy Ilocos Norte idi naibutaktak a sinerrek dagiti treasure hunters (agsapsapol kadagiti naikali a gameng) ti Culili Point idiay Brgy. Masintoc, Paoay, Ilocos Norte. Nalabit ti puntirya da ket dagiti maipagarup a naikali a balitok ditoy Amianan a paset iti makunkuna  a Yamashita treasure.

Ni Japanese General Tomoyuki Yamashita ti naakusar a nangsamsam kadagiti amin a gameng a kinabaknang ditoy Asia ken intugot na ditoy Pilipinas idi Maikadua a Gubat iti Sangalubungan. Maipagarup a pina-inlemmeng na ti uneg iti daga dagiti balitok sakbay a simmuko ti armadana a Japanese Imperial Army.

Ti Culili Point ti maysa kadagiti sand dunes a paggugusto dagiti turista a pagturturongan para ti sports adventure babaen ti panagluganda ti 4×4 jeeps, sand skating ken dadduma pay nga aktibidades dita ala-desierto a disso nga asidegen ti baybay.

Nabayag  gayamen nga agkalkali dagitoy a treasure hunters (THs) ngem kasla haan a napuotan dagiti agtuturay nangnangruna dagiti ahensia iti gobierno a taga-salaknib kadagiti aglawlaw. Inrason dagiti THs a pribado a lote ti nagkalianda ngem kwestionable met dagiti naipresentarda a dokumentos.

Nagtignay ti PENRO (Provincial Environment and Natural Resources) ngem dillawen dagiti kritiko ti maipagarup a panakaladawda. Kuna ti PENRO a paset iti geological monument ditoy Ilocos Norte ti nasao a disso. Ti adatna, adun a nakaun-uneg nga abot ti nakali dagiti treasure hunters. Moderno dagiti ramramitda.

Nagpalutpot dagiti inbestigators ngem dida met segurado no addan gameng a naiyaun dagiti THs manipud ti puseg iti daga. Pinasardeng ti PENRO ti panagkali dagiti 17 a katao a karaman iti grupo ken kinonpiskarda amin a ramramit a nausar iti ibilang ti PENRO nga illegal a panagbukkual iti daga a paset iti geological monument wenno protected areas.

Ti saludsod: Na-inquest kad ti kaso ken naisaklang kad dagiti masekan a THs?  Pudno kad ngamin nga adda naitalimeng a balitok idiay Masintoc?#