Panagpadispensar: Simbolo ti kinatakneng

001Sipapakumbaba a sinango ni Bise Mayor Thomas “Tom” Torralba ti Badoc, Ilocos Norte dagiti kamkameng ti lokal a media ditoy Laoag City idi malem ti Mierkoles, July 8, 2015 bayat iti naangay a dialogo nga immatangan dagiti nangangato nga opisiales ti kapolisan manipud ti Kampo Juan.

Apay ania a rason ti naisangsangayan a sangon-sango a dialogo iti nagbetngan dagiti taga-media ken ni dati a mayor nga agdama itan a Bise Mayor Tom Torralba? Partikular a madakdakamat a media ket isu dagiti miembros ti KBP (Kapisanan ng mga Brodkaster sa Pilipinas), Ilocos Norte-Laoag City chapter.

Kas taldiap, kastoy ngamin ti namunganayanna. Idi masukimat ti balay ni Apo Tom ken dagiti dua a kakabsatna dita Badoc babaen ti search warrant nga inwayat dagiti kapolisan idi napalabas a bulan ti Junio, adda timma-od nga alegasion a nakas-ang a panakatratarda dagiti taga-media babaen ti naisawang a pangta ken nakas-ang a balbalikas ni Apo Tom kontra kadagiti taga-media a simmurot ti nasa-o a PNP search team. Kalpasan daydi a pasamak, immerteng ti langen-langen ti nagbaetan dagiti taga-media ken ni Apo Tom. Adda binnakal ti napait a sarsarita babaen ti radyo.

Tapno matuldikan ti negatibo a relasion dagiti nasa-o a partidos ken maisubli ti napintas a langen-langen iti tunggal maysa, nagparang ngarud ti nasa-o a bise mayor iti dialogo ket sinsero a nagpakumbaba ken nagpadispensar ni Apo Tom kadagiti taga-media. Kalpasan ti nainpapusuan a panag-sorry na, nagpalakpak amin dagiti maseknan a timmabuno . Kayatna a sawen, inawatda ti panagpadispensar ti bise mayor–simbolo ti kinatakneng. Sapay koma ta lipatendan ti guran-gura ken saksakit ti nakem ti tunggal maysa. Ti panagpipinnakawat ket maibilang a nain-Kristiannuan nga aramid.#