Wagas a panangliklik ti atake ti puso, naiyadal kadagiti empleados

LAOAG CITY, Setiembre 25 (PIA) – – Inyadal dagiti doktor a kameng ti Ilocos Norte Medical Society (INMS) ti wagas a panangliklik iti sakit nga atake ti puso kadagiti empleado iti kapitolio babaen iti seminar itay napalabas a lawas ditoy.

Naisayangkat ti seminar maipanggep iti salun-at kas paset ti panangselebrar ti gobierno iti Ilocos Norte ti National Medicine Week iti bulan ti Setiembre nga addaan ti tema: “Nagkakaisang manggagamot tungo sa malusog na kalusugan, ang puso ay pangalagahan para sa magandang kinabukasan.

Kangrunaan a gagem iti seminar ti pannakaiyadal dagiti rumbeng nga aramiden tapno maliklikan dagiti kangrunaan a sakit a pagpeggadan dagiti umili kas iti hypertension, sakit ti puso ken dylipidemia.

Nagsarita iti seminar da Dr. Ellen Palomares, Dr. Maureen Valentin Guieb ken Dr. Benjamin Flor. Tapno maliklikan ti sakit ti puso ken hypertension, impaganetget dagiti nagsarita a doktor ti pannakaipaay iti “5 serving of  fruits and vegetables” ti tunggal aldaw,” dua nga oras a panagay-ayam ti video/computer games tunggal aldaw; maysa  nga oras a panagwatwat tunggal aldaw; 0 sugar drinks ken 0 smoking wenno “5-2-1-0-0.”

Kabayatanna, nagyaman dagiti kameng ti INMS kenni Gobernador Imee Marcos gapu iti naan-anay a panangsuportana ti programada tunggal maselebraran ti National Medicine Week iti kada bulan ti Setiembre. (Freddie G. Lazaro/PIA- 1)