Impasingked ni Gobernador Imee Marcos a masapul pay laeng ti naan-anay a pannakaitandudu iti benneg ti trade ken panagpuunan ditoy probinsia.
Kuna ti gobernador nga adu met latta dagiti umay agnegosio ken rumrumuar ti Ilocos Norte kadagiti advertisements babaen kadagiti nasinged a papagayam.
Inadmitir-na a nupay kurang iti pundo ti probinsia para ti advertisements itay napan a tawen, saan pay laeng a paudi iti Ilocos Norte gapu ti agtultuloy a panagadu dagiti agsangpet a local ken gangannaet a turista ken investors nga umay mangipundar kadagiti bukodda a puunan.
Mainag iti daytoy, inlawlawag ni Gob. Imee nga ad-adda nga itanduduna iti biang ti trade and investments ngem iti turismo.
Mamati iti ina ti probinsia a ti turismo ket maysa laeng a dana dagiti umay bumisita iti probinsia ngem ti nasken ket maimatangan ken mapaneknekanda a ti Ilocos Norte ket napintas a lugar a pangipundaran iti negosio.—PGIN-CMO
