Sirib Leadership Camp idiay Pasuquin, balligi

Siraragsak  James Ventura, Executive Director ti Ilocos Norte Sirib Youth Office ti gobierno probinsial a nangipakaammo a balligi ti kalkalpas a Sirib Leadership Camp Advance Training idiay Pasuquin.

Inlawlawagna a ti naisayangkat itay napan a bulan ti Oktobre ket pakpakauna a training a dagiti nakalpas iti “5 -day camp” ti nagsubli tapno ad-adda pay a manayonan ti ammo ken nasursuroda.

Inbatadna a gagem ti panagsanay ti ad-adda pay a manayonan ti ammo ken mapapintas ti skillsda nga agbalin a lider dagiti agtutubo ditoy Ilocos Norte.

Inpalgakna nga umabot iti 70 dagiti nagturpos iti “advance training” ken 40 dagiti nagsubli ken nakalpas iti advance training.

Inbunannag ni Ventura a saan nga agsarday ti panagensayoda tapno saanda a malipatan dagiti naipaadal kadakuada ken mapadur-as pay ti “facilitating skills” dagitoy.

Kangrunaan a tema ti leadership camp ket ti panagayat iti bukod a pagilian ken kasanonga agbalin a napigsa ken nalaing a lider nga agserbi iti probinsia.

Malaksid iti daytoy, maiyadal pay kadakuada no kasano ti panangmuli iti bukod a bagi tapno agbalin nga epektibo a makisarita ken makipulapol kadagiti lider iti gobierno. (PGIN – CMO)