Pangrugian a pagpuonan iti inpaay manen ti gobierno probinsial kadagiti benepisiario iti barangay 19 San Lorenzo, San Nicolas, Ilocos Norte.
Dagitoy ket dagiti naibunong a taraken a native a burias kadagiti nagkiddaw ken ni Gob.Imee Marcos babaen iti Presidente ti Women In Development a ni Mrs. Geraldine Ibe.
Sangapulo ket innem dagiti naited a burias kadagiti benepisiarIo manipud kadagiti nagduduma a Sitio iti nasao a barangay.
Dagiti naibunong ket patanor dagiti immunan a naikkan iti Association of Casilian iti ili a Bacarra.
Mismo a ni Senior Provincial Board member Hon. Mathew Marcos Manotoc ti nangatendar iti pannakaibunong dagitoy a binayabay met ni Provincial Veterinarian Dr. Loida Valenzuela.
Kiniddaw met ti Bokal kadagiti benepisiario ti agtultuloy a panangsuporta kadagiti mannalon kangrunaanna kadagiti babbai.
Kunana a napinpintas dagiti native a burias gapu ta naim-imas ti karnena.
Impanamnama ti bokal ti agtultuloy a panangsuporta ti gobierno probinsial iti aniaman a kiddawen dagiti umili nangruna no makatulong ken pagsayaatan ti kaadduan.
Indanon met ti President ti WID ti napalaus a panagyamanda ken ni Gob. Marcos gapu ta inaprobaranna ti nagbalin a kiddaw ken pannakaipaayen dagitoy.
Impasiguradona a dagiti naibunong a burias ket taraknen ken paganakenda agingga a mapaaduda sakbay nga ipasublatda iti sabali a mayat nga agtaraken. (PGIN-CMO)
