Pursigido ni Gobernador Imee Marcos a mangipaay ti naan-anay a pannarabay kadagiti agtutubo ditoy Ilocos Norte.
Mainaig iti daytoy, pinusgan ti gobernador ti Ilocos Norte Youth Development Office a mangaramid iti amin a kabaelanda a mangtulong kadagiti agtutubo ditoy Ilocos Norte.
Naammuan a malaksid iti “3-day training for Peer Counselors on Adolescent Health and Support for Mental Health Gap Action Program” nga isaysayangkat ti World Health Organization ken ti Department of Health iti Plaza del Norte nga at-atendaran dagiti agtutubo ket sumagmamano pay nga staff ti INYDO ti nagturong idiay Ilocos Sur para iti panagatendarda iti sabali pay a training/seminar.
Segun ken ni Mr. Arjay Rumbaoa ti INYDO, ti training/seminar nga atendaranda ket “Peer Education Training” nga atendaran dagiti agtutubo ditoy rehion 1.
Kunana a maisayangkat ti nasao nga aktibidad idiay Estrella del Mar, Santa Lucia, Ilocos Sur a mangrugi intono bigat ken agpatinggal intono Hulyo 23.
Inlawlawagna a ditoy a maiyadal ti pakaseknan ti pannakasaluad dagiti agtutubo kangrunaanna kadagiti maibilang iti LGBT Community ken ti pakaseknan ti human rights.
Inbunannagna a dagiti resource speakers ket aggapu iti nailian nga organisasion ti LGBT ken dodoctor.
Impasigurado ni Rumbaoa nga ania man a maadalda iti nasao a training/seminar ket ibinglaydanto kadagiti agtutubo ditoy probinsia. (PGIN-CMO)
