Binigbig ni Senador Joseph Victor “JV” Ejercito ti dakkel a suporta nga ipapaay ni Gob. Imee Marcos kadagiti agtutubo.
Segun kenkuana, dakkel ti nagbalin nga akem ti gobernador iti pannakapataud dagiti nalalaing ken mapagwadan a lider dagiti agtutubo.
Inlawlawagna a maysa pay ni Manang Imee kadagiti nakatulong kadakuada a nangsukog iti SK Reform law.
Imbatad ti senador a maysa ti gobernador kadagiti innalada a resource speakers bayat ti panangbukelda iti nasao a paglintegan gapu iti napintas a recordna iti panangidaulona iti Kabataan Barangay wenno KB.
Inbunannagna a nangipasada iti SK Reform Law kalpasan a saan a naaramid iti SK ti ninamnama kadakuada.
Kunana nga imbes a maikkaten a maminpinsan ti SK ket nangipasada ti baro a paglintegan a namnamaen a mangibangon iti organisasion dagiti agtutubo.
Ginutigut ni Ejercito dagiti agtutubo a makibiang, makipartisipar, agbalin nga aktibo ken agbutos iti SK election. (PGIN – CMO)
