BATAC CITY (Jan. 14) – Maysa a lalaki ti naduktalan laengen a natay kabayatan a matmaturog iti uneg ti naka-parking a tricycle na ditoy syudad.
Kuna ni SPO1 Christopher Pajinag ti PNP Batac a ti biktima nga agnagan ti Romeo Sagun, residente ti Brgy Pagsanahan, Badoc town ti napan naglako ti produkto da a lasona iti tiendaan ditoy Batac.
Gapu iti maipagarup a madi a marikrikna ti bagina, inturog pelang ti biktima iti uneg ti sidecar ti tricycle na a naka-parking. Kalpasan ti sumagmamano nga oras, ni Sagun ti saan metten a mariing ken naduktalan a natayen, kuna dagiti inbestigador ti insidente.
Iti naiyuswat nga eksaminasyon ti kameng ti City Health Office, nabatad nga awan foul play a napasamak. Nalabit, kuna dagiti dodoktor nga heart attack wenno stroke ti gapu ti ipapatay ti biktima.(Theo S. Guiang)
