Kinnamayet ti Federation of PCL-Region I pairtingen–Gob. Marcos

Saan nga agballaigi ti aniaman a ganuat no awan iti panagkakammayet ti maysa a grupo.

Daytoy ti bugas iti mensahe ni Gobernador Imee Marcos kalpasan a pinagsapatana dagiti opisiales ti Federation of Phil. Councilors League iti Region One idiay Fort Ilocandia Resort Hotel, Laoag City.

Dagitoy taga-liga ket manipud iti probinsia ti Pangasinan, La Union, Ilocos Sur ken iti probinsia ti Ilocos Norte.

Kuna ti gobernador a dagiti opisiales ken kameng iti PCL ti kabinnulig dagiti agtuturay pakairamamanan ti gobernador iti maysa a probinsia ti pannakaiyimplementar dagiti programa ken proyekto a pagsayaatan dagiti umili.

Inlawlawagna a napateg kadakuada a mangidaulo gapu ta kasapulan iti tulong dagitoy, laing ken kangrunaan na ti kina-agtutuboda.

Kuna ti gobernador a dakkel iti namnamaen dagiti umili kadakuada a nasken a maipaay ken masungbatan amin dagitoy.

Dinakamatna a kas iti edukasion, universal health coverage, pagtrabahuan ken dadduma pay a kiddawen dagiti umili kadagiti gobernador pakairamanan dagiti mayor.

Namnamaen met ti gobernador a ti sibubukel a Region One PCL ket maaddaan kadagiti napipintas a proyekto a makatulong ken makaitag-ay iti kasasaaad ti panagbiag dagiti umili.—PGIN-CMO