Kampania kontra ‘rabies,’ balligi iti Ilocos Norte

CURRIMAO, Ilocos Norte, Nov. 22 (PIA) – Balligi ti kampania kontra “rabies” iti Ilocos Norte babaen iti Communities Against Rabies Exposure wenno CARE Project a nagtinnulungan nga ingannuat ti Global Alliance for Rabies Control (GARC) ken ti administrasion ni Gobernador Imee Marcos iti amin nga ili iti probinsia.

Daytoy ti rakurak ni Dra. Sara Jaime, representante ti GARC iti Pilipinas, kabayatan ti “exit conference” ti proyekto nga inatendaran dagiti dadaulo ti GARC; ken dagiti empleyado ti Provincial Veterinary Office (PVO), Provincial Agriculture Office (PAO), Provincial Health Office (PHO), ken dagiti kameng ti Provincial Rabies Control Council (PRCC).

Napasamak ti taripnong itay nabiit iti Currimao, Ilocos Norte.Kinunana a sipud nangrugi ti naiget nga implementasion ti programa, nagbalin a ‘rabies-free province’ ti Ilocos Norte iti uneg ti dua a tawen manipud 2014.

Iti taripnong, inbaga pay ni Jaime a ti panagbalin ti Ilocos Norte a maysa a “rabies free province” ti kadakkelan a naaramidan ti CARE program nga agpatinggan iti daytoy a tawen.

“We thank the provincial government of Ilocos Norte in supporting this advocacy against rabies and for its success in the province,” kuna ni Jaime.

Inlawlawagna a saan laeng a ti panangsalluad ti umili iti Ilocos Norte kontra rabies ti panggep ti programa ngem ketdi mangitag-ay pay daytoy ti turismo iti probinsia. Inpalgakna a babaen iti nasao a programa, masalluadan amin a bisita ken turista kontra iti rabies.

Iti panagngudo ti CARE program iti probinsia, naisayangkat pay dagiti sumaganad nga aktibidades: quiz bee, pet blessing and parade, pormal a panakaiwaragawag ti pannakairaman iti kurikulum ti elementaria ti ‘rabies education and awareness,” ken ti pannakaisayangkat ti on-the-air question panggep ti rabies.

Idi Setiembre 28, 2016; inawat ti Ilocos Norte ti pammadayaw kas maysa kadagiti Best Local Government  Unit Rabies Program Implementers iti Pilipinas kabayatan ti National Celebration of World Rabies Day idiay Quezon City. (Cherry Joy D. Garma, PIA -1Ilocos Norte)