Pinaneknekan ti Ilocos Pride a maipagpannakkel ti Ilocos Norte iti benneg ti sports.
Daytoy ket kalpasan a dagitoy ti nangabak iti pannakilabanda iti team ti Star Magic iti score a 73-66 iti baet ti napalaus nga ik-ikkis dagiti fans bayat ti nasao a game.
Immun-una ngem iti daytoy, nakabaelan pay dagiti artista nga indauloan ni Daniel Padilla ti naglamang iti first half nangnangruna iti dandani nagsasaruno a three point shots da Daniel Padilla ken ni Ronnie Alonte bayat nga awan iti court ti team captain ti Ilocos Pride a ni Senior Sangguniang Panlalawigan Member Matthew Marcos Manotoc.
Nupay kasta, iti panangrugi ti third quarter agingga a nalpas ti nasao a game ket saanen a nagpa-substitute ni Manotoc a nangipakitaanna ti naan-anay a suportana iti team a dakkel a banag a nangitag-ay iti moral dagiti players ti Ilocos Pride.
Iti baet daytoy, imbatad ni Manotoc a saan nga importante ti panangabakda.
Kunana a napatpateg ti pannakaipaay ti ragsak kadagiti fans a napan nagbuya.
Kabayatanna, mangnamnama ni Manotoc a saan a nakana ti nagpasaran ni Ronnie Alonte a na-injured bayat ti maud-udin a sumagmamano a minutos iti nasao a game. (PGIN – CMO)
