Ilocos Norte PHO nagballaag kontra diarrhea, leptospirosis

LAOAG CITY, Agosto 24 (PIA) – Naballaag ti Provincial Health Office (PHO) iti Ilocos Norte maipanggep ti panagraira iti sakit a diarrhea gapu iti panakainum ti narugit a danum iti panawen ti panagtutudo.

Inlawlawag ni Dr. Josephine Ruedas, agdama a Provincial Health Officer ti Ilocos Norte, kadagiti umili a masapul a nadalus dagiti inumenda a danum kadagitoy a panawen tapno maliklikan ti panakarikna ti sakit ti tian a mangitunda ti panagtakki wenno panagsakit ti diarrhea.

Tapno sigurado a nalinis ti danum nga inumen kadagiti pagtaengan, kinuna ni Ruedas a nagiwaras ti Department of Health (DOH) iti libre a hyposol kadagiti amin a Rural Health Unit (RHU) iti probinsia. Daytoy a hyposol ti mailaok iti danum tapno madalusan ken natalged nga inumin.

“Amin nga umili mabalinda ti mapan dumawat ti libre a hyposol kadagiti RHU iti ilida,” kinunana.

Kabayatanna, nagballaag pay ni Ruedas kadagiti umili a saanda nga agdalliasat kadagiti narugit a danum tapno maliklikanda ti agsagaba iti sakit a leptospirosis.

Kinunana a liklikan koma dagiti umili a pagnaan dagiti lugar a naurnongan ti danum amangan no naisboan dagitoy ti bao. Segun kenkuana ti isbo ti bao ti pakaalaan ti sakit a leptospirosis, a maysa kadagiti sakit nga agraira no panawen ti panagtutudo. (Freddie G. Lazaro/PIA-1,Ilocos Norte)