Ibilang ni Gobernador Imee Marcos a dakkel a gapoanan ti Criminal Investigation and Detection Group wenno CIDG ti panagballigi da a nangtiliw iti top 4 Most Wanted Person iti Lambat Sibat ditoy Ilocos Norte.
Naidatag iti gobernador ti akusado a ni Joseph Ladera, agtawen ti 35, taga Brgy Alogoog ti ili a Badoc babaen iti CIDG.
Daytoy ket kalpasan ti panagballigi da a nangtiliw ken ni Ladera idiay syudad ti Davao a nagnaedan na sipud napapatay na ti biktima a ni Roseman Cardenas iti met laeng Brgy Alogoog ti ili a Badoc.
Napasamak ti insidente idi Septiembre 17, tawen 2011.
Natiliw ni Ladera idiay syudad ti Davao babaen iti bileg ti alias warrant of arrest nga inyisyu ni Judge Isidoro Pobre.
Nagnaed ni Ladera idiay Davao iti napalabas a sumagmamano a tawen gapu ta idiay ti pagnanaedan ti asawa ken dagiti annak na.
Karaman ti akusado iti target list ti Provincial Anti-Partisan Armed Group and Dangerous Drug Council wenno PAPAGDDC. (pgin-cmo)
