Napintas ti resulta ti “garlic tissue culture” nga inyusuat a programa ti gobierno probinsial iti ili a Burgos, Ilocos Norte.
Daytoy ket kalpasan a pinadas dagiti mannalon ti nagmula iti daytoy babaen ti pannakaitukit nga immuna ti tissue cultured a bawang ken kalpasan ti tallo a bulan ket naimulan dagitoy iti kataltalonan.
Inpresentarda a mismo daytoy ken ni Gobernador Imee Marcos kabayatan ti Manang Imee’s Capitol Express Paspas Dur-as biag ti away.
Naragsakan met ti gobernador gapu ta nakitana ti nagbanagan ti eksperimento ti probinsia mainaig iti garlic tissue culture.
Segun ken ni Ronald Garanda iti barangay Paayas , Burgos , maysa kadagiti nagmula iti daytoy, nupay babassit ket awan ti nalpes kadagiti binukel.
Inlawlawagna nga insemilyada daytoy ken idi nagtubon, inyakarda iti lugar a dimmakkelanda agingga nga inapitda.
Inbunannagna a ti “tissue culture” ket awan dagiti eppesna no ikumpera kadagiti gagangay a bawang a kinagiddanna.
Kunana a bassit laeng ti inmulada gapu ta nangipadasanda laeng kas inyusuat nga eksperimento ti gobierno probinsial.
Innayonna a napinpintas nga amang ti “tissue culture” ngem ti gagangay a panagmula ti bawang. (PGIN – CMO)