Naisayangkat ti “ground breaking” ti pakaipasdekan ti baro a tiendaan ti ili a Pagudpud idi kalman.
Naigiddan daytoy iti selebrasion ti maika-62 nga anibersaryo ti pannakaipasdek ti nadakamat nga ili.
Masarakan ti nasao a tiendaan iti igid ti national highway iti sakup ti Brgy. Tarrag iti nadakamat nga ili.
Imbatad ni Manang Imee a napintas daytoy nga “investment” ti ili a Pagudpud.
Segun kenkuana, saan laeng a dagiti agtagikua ken dagiti dadakkel a korporasion ti mabenipisiaran.
Mangnamnama ni Manang Imee a daytoy ti mangnayon ti mapastrek ti tunggal pamilia iti nasao nga ili.
Inbunannagna nga idauluan ni Architect Rex Hofileña ti pannakaipasdek ti tiendaan.
Inlawlawagna a naunday unayen ti pannakaitantan ti panagdur-as ti ili a Pagudpud ket mangnamnama a babaen ti pannakaipatakder ti baro a tiendaan ket magun-oden ti nasao a panagdur-as.
Namnamaen ti gobernador a daytoy ti solusion ti panagbirbiruk dagiti turista iti umdas a lugar a mangidiaya kadagiti pagkasapulanda bayat ti kaaddada iti nadakamat nga ili. (PGIN – CMO)
