Agtutubo agtignay para iti nadur-as nga Ilocos Norte

LAOAG CITY, Abril 26 (PIA) – – Nakiddaw nga agtignay amin nga agtutubo para iti nadur-as a masakbayan ti Ilocos Norte.

Daytoy ti kangrunaan a waragawag dagiti dadaulo ti Sirib Ilokano Kabataan Association (SIKA) kabayatan ti selebrasion ti maikatlo nga anibersario ti grupo dagiti agtutubo itay nabiit.

Napundar ti SIKA babaen kenni Gobernador Imee Marcos idi 2014 tapno maipasagepsep ti disiplina ken pagrebbengan dagiti agtutubo para iti nadur-as nga Ilocos Norte iti masakbayan. Trataren pay ti SIKA amin a programa a maipaay kadagiti agtutubo.

“Aggaraw, agtrabaho dagiti agtutubo para ti nadur-as a masakbayan ti Ilocos Norte; ken ipakita ti panagayat iti bukod a lugar,” kinuna ni Weenter Ventura, mangidaulo ti Ilocos Norte Youth and Development Office (INYDO) a mangimanmanehar ti SIKA.

Mayataday ti kinuna ni Ventura iti tema ti selebrasion ti maikatlo nga anibersario ti SIKA: “Kumilos ka bes, Pusuan ang Bayan.”

Mamati ni Ventura a maragpat amin nga arapaap ti grupo dagiti agtutubo no adda panagkaykaysa ken pannakipaset ti tunggal maysa kadagiti programa ken aktibidad iti probinsia.

Kidkiddawenna amin nga agtutubo iti Ilocos Norte nga agmiembro iti SIKA. Iti agdama, umaboten ti 1,500 ti kameng ti grupo.

Kalikagumna pay a madanon ti SIKA amin a barangay iti Ilocos Norte tapno maipakaaammo dagiti amin a programa para kadagiti agtutubo.

Agtultuloy met dagiti napintas a programa ti SIKA a makatulong kadagiti lumugar iti probinsia.

Iti daytoy a bulan ti Abril, madama nga isaysayangkat ti SIKA dagiti sumaganad a programa: SIKAlikasan wenno panagmula kadagiti patubo a kayo; SIKAlinisan wenno kampania ti panagdaldalus iti barangay; SIKArunungan wenno “tutorial session;” ken SIKAtubigan wenno kampania ti panagdaldalus iti igid ti baybay ken iti karayan.

Awan ti magastos ti grupo wenno “zero cost activity” dagiti nasao programa gapu ta inubra dagiti kameng ti SIKA kadagiti naduma-duma nga ili ken siudad iti probinsia.

Kinarit ni Ventura dagiti agtutubo nga usarenda ti bukodda a panunot ken pigsa para iti umiso nga aramid ken pagimbagan ti kaadduan. (Freddie G. Lazaro/PIA – 1)