“Pontifical Coronation”, balligi gapu iti napintas a panagtitimpuyog

BADOC, Ilocos Norte — Umab-abot iti sangapulo ribu a deboto ti timmabuno iti “pontifical coronation” ken ni La Virgen Milagrosa de Badoc. Ti misa ket indauloan a mismo ni Luis Antonio Cardinal Tagle, arsobispo ti Manila a nangibagi ken ni Pope Francis.

Inyawat a mismo ni Gobernador Imee Marcos iti arsobispo ti korona ni La Virgen kas Hermana Mayor ita a tawen 2018 idinto a ni Mayor Maximo Cajigal ti nangiyawat ti korona ti ubing a ni Hesus nga inubba ti birhen kas Hermano Mayor.

Kabayatan ti misa, maysa a nakarikna iti milagro ni La Virgen Milagrosa ti naikkan iti gundaway a nagsarita iti sanguanan dagiti naruay a deboto.

Naituloy ti selebrasion iti malem babaen ti pannakaisayangkat ti “Thanksgiving mass” nga indauluan ni Bishop Renato Mayugba iti Diocese of Laoag.

Iti nasao a misa, impadanon ni Dr. Feliberg Salvador, presidente ti Parish Pastoral Council iti ili a Badoc ti panagyamanna iti panagballigi ti nasao a naindaklan nga okasion.

Imbatadna a daytoy ket gapu iti napintas a panagkakammayet ti gobierno probinsial, gobierno munisipal ti ili a Badoc, simbaan ken dagiti nadumaduma nga organisasion.

Kangrunaan a dinakamatna a dakkel ti naitulongna iti pannakaisagana ken pannakapapintas ti simbaan da Gob. Imee Marcos, Mayor Maximo Cajigal, ABC Pres. Virgilio Calajate ken Provincial Treasurer Mrs. Josephine Calajate.

Inbunannagna pay a dakkel a pakaidayawan dagiti umili iti ili a Badoc ti pannakasangailida kada Luis Antonio Cardinal Tagle, arsobispo ti Manila, Orlando Cardinal Quebedo, arsobispo ti Cotabato, naruay nga Obispo ken papadi manipud iti nadumaduma a lugar iti pagilian.

Mangnamnama met ni Bishop Mayugba a ti pannakakorona ti birhen ti ad-adda pay a mangparayray ti pammati dagiti umili ti Ilocos Norte. (PGIN-CMO)