LGU nakiddaw nga agtungpal iti pagalagadan ti RA 9003

By Freddie G. Lazaro

LAOAG CITY (PIA) — Kiniddaw ti Department of Environment and Natural Resources (DENR) dagiti local government units (LGUs) ti panangipasada iti kabiitan a panawen ti solid waste management plan kas panangtungpalda ti pagalagadan ti RA 9003.

Segun kenni Usec. Jonas Leones, agdama a DENR Undersecretary for policy planning and international affairs, nakurang a 30 a porsiento pay laeng ti LGU iti intero a pagilian ti nagtungpal iti Solid Waste Management provision ti RA 9003.

Kinunana a maysa a kangrunaan a kasapulan nga ibagbaga ti RA 9003 ti panakaipasdek ti bukod a sanitary landfill ti kada LGU ngem manmano pay laeng nga ili ken siudad ti nagtungpal gapu iti kinangina ti lote a pagdissuanna.

Gapu iti daytoy, impadamag ni Leones a naisingasing ti “clustering” tapno saan a marigatan dagiti LGU’s a mangipatakder ti sanitary landfill.

Nupay kasta, kuna ni Leones a saan a makaanay a mangsolbar ti problema ti pannakapaadda ti sanitary landfill isu a makitkitada ti umiso a teknolohia a mamagbalin a paggapuan ti enerhia dagiti maurnong a basura.

Kabayatanna, impalgak ni Gobernador Imee Marcos a masolbar ti problema ti basura iti intero a pagilian babaen ti panagtitinnulong dagiti umili ken ti gobierno.

Kinunana a ti kaadda ti adu a basura ti kangrunaan a rason no apay nga adda panaglayus kadagiti dadduma a luglugar iti pagilian gapu ta dagitoy a basura ti mangbara ti kanal a pagayusan ti danum.

“Masapul a responsable ti tunggal umili nga imanehar ti basura manipud iti pagtaenganna tapno malapdan ti panagkaiwara ti basura ken agtalinaed a nadalus ti aglawlaw,” kinuna ni Marcos. (Freddie G. Lazaro/PIA-1)