Binigbig ti ina dagiti agkabsat nga atleta iti ili a Piddig ti pannakapanunnot ni Senior Sangguniang Panlalawigan Member Matthew Joseph Marcos Manotoc a maipaayan ti scholarship dagiti nalalaing nga atleta ti Ilocos Norte.
Segun ken ni Mrs. Miracle Lacuesta, residente ti Brgy. 2 Anao iti ili a Piddig, dakkel a banag daytoy saan laeng a kadagiti atleta ngem uray pay kadakuada a nagannak.
Imbatadna a dua dagiti annakna a karaman kadagiti kaunaan a Sirib Athletic Scholar ti probinsia a nangawat ti stipendda para iti umuna a semestre ken ti uniform allowanceda.
Kunana a dagitoy ket da Rem Alejandro Lacuesta, Grade IX ti Piddig National High School ken ni Chloine Napthalie Lacuesta ti Piddig South Central Elem. School nga adda iti Grade VI ket agpada nga atleta ti Taekwondo.
Inlawlawagna a nakagun-od ti anakna nga adda iti sekondaria iti dua a bronze ken maysa a silver ken maysa met a bronze ti adda pay laeng iti elementaria nga anakna iti kaudian a Region One Athletic Association Meet.
Inbunannagna a nakadakdakkel a tulong kadakuada ti panagbalin dagiti annakda nga iskolar gapu ta nangina ti training fee ti Taekwondo ken kas nagannak ket napinget ti tarigagayda a mangipaay ti naan-anay a suporta kadakuada.
Malaksid iti daytoy, mamati ni Lacuesta nga agserbi pay daytoy nga inspirasion kadagiti annakna tapno ad-adda pay nga agsensayoda para iti napilida nga event ken kasta metten ti panangipasnekda ti panagadalda.
Mainaig iti daytoy, impadanonna ti napalaus a panagyamanna ken ni Manotoc ken iti sibubukel a probinsia gapu iti daytoy nga scholarship program. (PGIN-CMO)
