(Iluko version) Agsalagasag ti siniales nga addan paglawlawagan dagiti kaso iti adu a pammatay ditoy Ilocos Norte partikular idiay ili iti Marcos.
Arigna inagaw payen ti Marcos town iti titulo a “kinamalalaki” manipud iti ili a Badoc ken Pinili. Adda nalatak a Iluko a kanta a kunana “Napanak idiay Pinili a nagadal iti kinamalalaki…”
No masolbar ni apo Provincial Director Senior Supt. Jose Melencio Nartatez Jr. ken dagiti buyotna a ka-polisan dagitoy a kaskaso iti pammatay, di bumurong nga agrag-o ti kaadduan nangnangruna dagiti pampamilia ken papagayam dagiti biktima a gumawgawawa ti panakagun-od iti hustisya.
Gapu ta addan natiliw a suspek ken “nagkanta” mainaig kadagiti kaskaso iti pammaltog, siniales nga agsanga-sangan dagiti konektado a krimen a napaspasamak ditoy probinsya.
No adda man natiliw ken naakusar iti biang iti korte a personalidad a maipagarup a mastermind, triggerman ken kakonsabo iti nagduduma a krimen, haanna kayat a sawen nga isudan ti pudpudno nga akin-aramid ti krimen.
Ngamin, korte wenno husgado laeng ti pinal a mangngeddeng a “guilty” wenno “not guilty” ti siasinno man nga akusado.
Arigna maysa a batonlagip iti liderato ni apo PD Nartatez Jr. no masolbarna ti 80 porsiento a bilang dagiti krimen ditoy probinsya ken addanto koma dagiti personalidad a makonbiktaran iti korte ken maikaliboso iti karsel.
Tuladenna ni ulitegna a Koronel Everlino Nartatez (tubo iti Ilocos Sur) a nag-Provincial Commander iti PC-INP ditoy Ilocos Norte idi 1980s. Isuna ket pagwadan gapu ta nangibati ti pakasaritaan a kinatured ken kina-alibtak a nangsaranget ti parikut iti insurhensya dagiti makanningid a puersa iti New People’s Army a nagriribok ti probinsya iti Ilocos Norte idi 1980s.#
