By Freddie G. Lazaro
LAOAG CITY – – Numanpay adu ti nagappuanan ti kapulisan kontra iti ilegal nga aramid iti Ilocos Norte, agtultuloy latta ti nainget nga operasion dagiti pannakabagi ti linteg tapno naan-anay ti pannakapaksiat dagiti kriminals nga adda iti probinsia.
Segun kenni Chief Inspector Randy Baoit, agdama a hepe ti operations branch ti Ilocos Norte Police Provincial Office (INPPO), adda latta dagiti tumaud a kriminal nga agpanggep nga agaramid ti kinadakes a manggundaway ti kinatalinaay ti probinsia iti agdama isu nga agnanayon latta ti kinaridam dagiti kapulisan.
“Masapul a mapaingetan latta ti operasion dagiti kapulisan kontra iti aniaman a klase ti krimen a sumangbay iti probinsia tapno mapakadaan ken saan nga agballigi dagitoy,” kinuna ni Baoit.
Kabayatanna, naragsakan ni Gobernador Imee Marcos apaman a nammuanna dagiti balligi a nagapuanan ti kapulisan ti tawen 2017 iti napasamak a taripnong dagiti kameng ti Provincial Peace and Order Council (PPOC) ken Provincial Anti-Drug Abuse Council (PADAC) a napasamak iti kapitolio itay nabiit.
Basar iti report ni Baoit, dagiti sumaganad ti sumagmamano a naaramidan ti kapulisan iti tawen 2017: iti 41 nga insayangkat nga operasion ti kapulisan kontra iti ilegal a sugal manipud Enero agingga iti Disiembre 2017, 217 dagiti naarestar; iti met ilegal logging–15 nga operasion ti naisayangkat ken 21 dagiti naarestar a nakaalaan ti agduduma a tablon ti kayo nga agdagup iti 27,765 board feet a mapatta-patta nga agbalor ti nasurok a P84, 000.00.
Iti kampania kontra ti ilegal a panagkalap, uppat nga operasion ti naiyuswat, 11 a tattao ti natiliw ken nakakumpiskaran ti dua nga “electric fishing device” ken naduma-duma a klase ti ikan.
Iti met biang ti kampania kontra panagagab (cattle rustling), dua ti naarestar iti napasamak a lima nga operasion a nakapasublian ti lima a baka.
Iti operasion kontra carnapping, agdagup ti 15 nga operasion ti naaramid ngem tallo a tao ti naarestar ken nakarekoberan ti uppat a motorsiklo.
Kabayatanna, agdagup ti pito a License To Own and Possessed Firearms (LTOPF) karaban iti naisayangkat iti probinsia a nakabenepisiaran ti 2,146 nga umili nga addaan imet a paltog a nagpason ti lisensiana.
Tapno naannayas ti panakaireport amin nga insidente a masapul a maaksionan ti kapulisan nga insigida, mapapigsa ti panagkikinnamayet dagiti maseknan a departamento kangrunaanna ti Provincial Incidence Response Managamenent wenno 911 ken ti PNP mobile patrol unit. (Freddie G. Lazaro/PIA-1)
