Birhen Milagrosa De Badoc, makoronaan intono Mayo 31

Naruay a pammendision ti nasagrap ti Diocese of Laoag itay napalabas a tawen 2017.
Daytoy ti siraragsak nga inpakaammo ni Bishop Renato Mayugba kalpasan ti naisayangkat a misa idiay St. John de Baptist Church iti ili a Badoc iti panangrambak ti fiesta ti panagbunyag ni Jesus Christ.

Imbatadna a maibilang ditoy ti pannakaawat ti simbaan ti “decree” a mangipalubos iti pannakakorona ni Birhen Maria kas Milagrosa de Badoc.

Segun iti Obispo, impatulodna ti suratna a mangkidkiddaw iti daytoy a banag idi Septiembre otso a kasangay ti birhen, napirmaan ti “decree” idi Disiembre sais a fiesta ni Santa Claus ken naawatda ti dokumento iti fiesta ti panagbunyag ni Jesus Christ ken ti nangbunyag kenkuana ket ni St. John de Baptist a “patron saint” ti ili a Badoc.

Kunana a karaman kadagiti nagbasaran ti Vatican ket ti kinabayagen ti debosion ken ni Birhen Maria ken ti kinaadun dagiti milagro a mangipaneknek a dumdumngeg ti birhen iti kararag dagiti deboto.

Impalgakna nga adu dagiti wagas a panangpadayaw ken ni birhen Maria babaen iti pannakakoronana iti nadumaduma nga okasion ken iti nadumaduma nga otoridad.

Inlawlawagna a no iti parokya ti pakakoronaanna ket ti padi ti mangdutok iti mangkorona, no iti diocese kas iti pannakakoronana idi 1980 ket ni Bishop Edmundo Abaya ti nangkorona ken ti maisayangkat a pannakakoronana intono Mayo 31 ket mismo a ni Pope Francis ti nangpirma ti “decree” para ti pannakakoronana.

Kalikagum ti Obispo a ti pannakakorona ni Birhen Milagrosa de Badoc ket maysa kadagiti kangrunaan a tampok iti selebrasion ti maikaduagasut nga anibersario ti Ilocos Norte.
Mamati ni Mayugba a patgan daytoy ni Gob. Imee Marcos a maysa kadagiti mabigbig a deboto ni Birhen Milagrosa a patron saint ti probinsia. (pgin-cmo)