Dinayaw dagiti umili ditoy probinsia ti panangsursor ni Senior Sangguniang Panlalawigan Member Matthew Joseph Marcos Manotoc kadagiti hospital ti probinsia.
Segun ken ni Flor Tungpalan, agtawen ti 78 a taga-Brgy. Cali iti ili a Dingras ken maysa kadagiti mangbanbantay ti pasientena iti Dona Josefa District Hospital iti ili, a Marcos iti pagaammona, ti pay laeng nadakamat a bokal iti maikadua a distrito ti probinsia ti napuotanna nga opisial ti probinsia a nangbisita iti nasao a district hospital.
Mainaig iti daytoy, imbatadna a nupay ubing pay ti bokal ket maipamatmat ti kaadda ti pannakaseknanna iti salun-at dagiti umili.
Mangnamnama ni Tungpalan a ti pannakakita ni Manotoc ti kasasaad dagiti pasiente ket mangipasa iti gakat tapno maipaayan ti ad-adu nga agas dagiti nakukurapay a maiserserrek kadagiti hospital ti probinsia.
Malaksid iti daytoy, nagapela a dagiti nakukurapay ti maipangpangruna a pakaipaayan dagiti agas nga ibunbunong ti gobierno probinsial iti liderato ni Gob. Imee Marcos kadagiti nadumaduma a barangay ditoy probinsia.
Kabayatanna, idiay Dingras District Hospital, saan met a mailadawan ti kinaragsak, saan laeng a dagiti pasiente, ngem dagiti pay agpapaay iti hospital.
Imbatadda a nakariknada ti naidumduma a kinaragsak iti panangpasiar ti bokal iti hospital ken arigna nangpalag-an ti rikna dagiti masaksakit.
Namnamaenda nga iti pannakakita ti bokal kadagiti situasion dagiti hospital ti probinsia ket al-alisto a maipaay dagiti pagkasapulanda kadagiti masungsungad nga aldaw. (PGIN-CMO)
Watch live here
