Bakasyon, Sarabo, Kdpy.

Bakasyon, Sarabo, Kdpy.
ni Eduardo Benavidez
Bacnotan, La Union (OFW of Saudi Arabia)

Pinirmahan a kontrata, nalpasen
Pasaporte ken tiket, iggemen
Umuna a bakasyon, agawiden
Ragsak, agluplupyasen!

Duwa a bagahe, napunnon ti sarabo
Ag-excess san, diak sigurado
Nadumaduma a karga, agtutuon nakaad-adu
Para dagiti pamilya, kakabagyan ken dudungngo
Agraman kaarruba a tsismosa ken tsismoso.

Linaon ti bitbit nga hand-carry
“Buy one, take one” aglalaok a tsokolati
Ibusen a dagus asidegen ti petsa nga expiry
Awan basolko no sikanto ti agtakki.

Adda met ginatang nga aritos, kwintas ken porselas
Agduduma a disenyo naaramid ti balitok
Nga agkaraiwara ti pagilian dagiti Ari
Arwaten ni misis tapno makagargari.

Awan ti nagatang nga arak ditoy Saudi
Ta maiparit ngem adda met sadiki
Gumatangton ti imported nga arak diay Duty Free
Isangpet, agiinom kadwa dagiti kumpare, party, party!

Sakbay nga agawid, agpapukis pay diay barberya
Tapno nataraki makitada a sumangpet diay NAIA
Saan a lipatan nga isuot ti sunglass a Carrera
Uray rabiin ti panag-landing, por dios santisima!

Agpantalon met ti Levi’s 501, siguradwen original
Terno na met leather jacket saan pay a nalabaan
Sapatos a CAT a black nadagsen rigatna ipagnan
Pormang Robin Padilla, pannagna, aglisikan!

Kwintas a balitok a napuskol, arwaten
Nangabakan ti Thai Lottery sweldo naibusen
Dayta rupa, marisna amarilyo sumilsilapen
Kasla naggapu ti hospital, adda Hepatitis, narigat maagasanen.

Kasta unay ti porma nga aggapu ti Saudi Arabia
Agsaganakan gayyem, inton sumangpetka NAIA
Dagiti empleyado, umisemda kenka, sarabo dumawatda
Agalwadka inton agbyaheka agpa-probinsya, baka ma-holdap ka!

Sarabo kenni misis, ay ket, reding-redi!
Masorpresa isuna, sigurado sam-it isemna apagbingngi
Impaaramid nga espesyal, made in Saudi
Awan kaaspingna, brand na “Tash & Bolly”.