ANNAD LAENG

ni Eduardo Benavidez
Bacnotan, La Union (OFW of Saudi Arabia)

Iti nadarasudos a panagsao
No saantayo nga usaren ti utektayo
Ken dagiti dua a bukel a matatayo
Por dios por santo, bukod a bagi ti mairubo.

No inka agiyebkas ti balikas
Alwadan kasla uni ti armalite a napardas
Dinto ket sikanto ti agkuripaspas
Guyab-guyabannaka ti naatap a banyas.

Saanka nga agbuteng uray nabuntogka
Agtrabaho man nga usaren dagiti mata
Bay-am isuda nga umuna
Ta iti panagbiag saan a linnumba.

Balikas nga Iluko nagpaiduma
No daytoy ket ikumpara ti sabali a daga
Maysa laeng a letra nagdumaan, naspak ti raya-raya
Kilo ken killo, makitam kadi ti nagdumaanda?