English write-up by Rev. Fr. Noel Ian G. Rabago
Parish Priest, St. Andrew Parish
Bacarra, Ilocos Norte
Inyallatiw iti Iluko ni Josefina Piedad-Lucas
Commentator/Lector
St. William Cathedral Parish
Laoag City, Ilocos Norte
MAARAMID ti naisangsangayan ken napnuan kaipapanan a Pannakakorona — PONTIFICAL CORONATION– ni La Virgen Milagrosa De Badoc-Nuestra Señora, Causa De La Nuestra Alegria, babaen iti Nagan ken Bileg ni Santo Papa, Pope Francis. Daytoy a Pannakakorona ket maaramid babaen kenni His Eminence, Luis Antonio G. Cardinal Tagle, D. D., Archbishop of Manila inton May 31, 2018 (Huwebes) iti oras ti alas nueve ti bigat (9:00 AM) idiay Santuariona a masarakan iti Parokia ni St. John the Baptist, Badoc, Ilocos Norte.
Iti naimpapusoan a ragsak ken panagyaman, iyaw-awis ti Obispo ti Diocese of Laoag, His Excellency, Most Rev. Renato P. Mayugba, D. D., ti intayo itatabuno iti daytoy nakallalagip a pannakakorona ni Virgen Milagrosa de Badoc, Puon ti Ragsakmi ken Patron ti Ilocos Norte.
Rinambakan ti Probinsia ti Ilocos Norte ken ti Diocesis ti Laoag ti managan ” La Milagrosa Festival ” idi May 5, 2012. Daytoy ket bunga ti panagtinnulong ken panangiwanwan dagiti dadaulo iti gobierno ken simbaan nga idauloanda Governor Imee R. Marcos ti Probinsia ti Ilocos Norte, Rev. Msgr. Noel Ian G. Rabago, JCL, nga isu ti Diocesan Administrator of the Roman Catholic Church of Ilocos Norte idi naaramid daytoy a panagrambak, ken ni Most Rev. Renato P. Mayugba, D. D., Obispo ti Laoag. Maitultuloy a marambakan daytoy ” La Milagrosa Festival ” kada umuna a Sabado iti bulan ti Mayo kada tawen.
DAYTOY sumaganad ti historia ni La Virgen Milarosa de Badoc, “puon ti ragsakmi” nga isu ti patron ti Ilocos Norte.
Napnuan misterio ken pammati ti naisangsangayan a pakasaritaan ti madaydayaw nga imahen ni “ La Virgen Milagrosa de Badoc.” Nangrugi daytoy a pasamak ti maysa nga aldaw ti Viernes idi tawen 1620, iti natalinaay a baybay ti Lugo, sitio Dadalaquiten Norte, a barrio ti Sinait, Ilocos Sur. Adda nakita dagiti agkalkalap manipud iti dayta a lugar ken ti kabangibangna a Badoc, Ilocos Norte a dua (2) a kahon a naaramid iti kayo nga agtatapaw iti tengnga ti taaw. Inwayat ngarud dagiti mangngalap dagiti iketda ket ginuyodda sada impan dagitoy dua a kahon ti takdang.
Inaribungbongan ti adu a tattao dagitoy datdatlag a dua a kahon a naalaw dagiti mangngalap.
Kalpasanna, insigida a linukatanda babaen ti panangusarda ti buneng ken kampilan. Napalaus ti siddaaw dagiti naruay a tattao idi nakitada ti linaon dagiti dua a kahon: Maysa a nangisit nga imahen ni Apo Jesus a kas kadakkel ti nailansa a Cristo iti krus ken maysa a basbassit nga imahen ni Santa Maria ken ti Ubing a Jesus, dua nga angheles ken maysa a biolin.
Gapu ti pammatida a nasagrado dagitoy a banag, nagtutulaganda nga ipan dagitoy nga imahen kadagiti simbaanda.
Kayat dagiti taga Sinait nga alaen ti Virgen ket ti met Nangisit a Cristo ti kayat dagiti taga Badoc. Ngem nasdaaw dagiti tattao ta uray no kasano ti kaadu dagidi lallaki a mangbagkat kadagiti kahon, saanda a makuti dagitoy. Nagtutulagda ngarud nga agsisinnukatda ti alaen nga imahen. Siddaaw ken ragsak ti narikna dagiti tattao gapu ta iti dayta a kanito, nagballigida met laeng a nangbagkat ken nangiyawid kadagiti dua nga imahen.
Naamirisda ngarud a ti Santo Cristo ket para idiay simbaan ti Sinait ket ti met simbaan ti Badoc ti kayat ti Virgen nga agbalin a sanctuariona. Iti agdama, masarakan iti uneg ti St. John The Baptist Parish Church idiay Badoc, Ilocos Norte daytoy imahen ni Virgen Santa Maria, a mapattapanta a dandani uppat a gasut (400) a tawen ti kinadaannan.
Segun kadagiti lideres tayo iti Simbaan, maipagarup a dagitoy a nasa-o a dua kahon a naalaw dagidi mangngalap iti sakop ti baybay ti South China Sea ket naggapu manipud ti pagilian nga Hapon a pakapaspasamakan idi ti pannakaparparigat dagiti Kristiano a nagresulta iti pannakamartirda Apo San Lorenzo Ruiz ken dagidi kakadduana a misioneros. Dagiti simbaan, imahen ken pagilasinan ti kina-Kristiano ket rinebba ken dinadael dagidi kabusor ti Pammati Katoliko. Dagiti nasa-o a dua a kahon ket mabalin a naiyanud iti baybay ket nakem ni Apo Dios a naisadsadda ditoy Ilocos.
Adun a milagro ti impakpakita ti Virgen. Manipud 1656 – 1660 naipan idiay Vigan tapno dawaten dagiti deboto ti panangibabaetna tapno maispalda kadagiti naruay a kalamidad. Kalpasan ti panangidatonda kadagiti karkararag ken sagsagut, napatgan dagiti dawdawatda.
Idi 1776, rinaut dagiti mapagbutbutngan a Moro a pirata dagiti barrio a masarakan iti igid ti baybay ti ili a Badoc ket nagsamsamda kadagiti gameng ti simbaan. Pinadasda pay a putulen ti ulo ti Virgen Santa Maria ngem napaayda. Iti pungtot dagidi pirata, innalada ti imahen ket inyaronda daytoy iti apuy bayat ti panaglutlutoda ti makan. Nakigtot dagidi pirata gaputa dagus met la a naiddep ti apuy a dida maawatan no apay. Gapu ti dayta a misterio a pasamak, sibubuteng a pimmanaw dagiti pirata ket binaybay-anda nga imbati didiay imahen ni Virgen. Iti agdama, adda nabati a piglat iti ngatuen ti makannigid a matana kas tanda ti kinadawel dagidi pirata.
Idi 1836, adda sabali manen a panagraut dagiti pirata ti ili iti Badoc. Sakbay a simmanglad dagidi pirata, naammoan dagiti tattao ket inlemmengda dagiti gamgamengda ket pimmanawda a napan naglemmeng kadagiti kaasitgan a bantay. Idi ta awan makita dagiti pirata nagpungtotda ket pinuoranda dagiti balbalay, simbaan ken kumbento. Kalpasan ti panagraut, nagsubli dagiti tattao a napnuan ti buteng ket nakitada dagiti nadadaelen a balbalayda, ngem ti baet ti gumilgil-ayab a beggang iti uneg ti simbaan, nagragsakda dagiti tattao gapu ta saan a pulos naan-
ano ti imahen ni Birhen Santa Maria. Kadagiti napudno, mamati ken mannagayat a tattao, daytoy manen ti mangipasimudaag ti pannarabay ti Virgen kadagiti umili ken ti kalikagumna nga agtalinaed iti ilida. Kasta pay a no saan a kayat ti Virgen ti maiyalis ket agpadagsen daytoy nga imahen ta uray lima a nabasked a lallake marigatanda a mangbagkat.
Idi May 1, 1980, naipan ti imahen ti Virgen ken ti imahen ti Nailansa a Cristo idiay Lugo a lugar a nakasarakan kadakuada dagidi mangngalap idi 1620. Isu ti umuna a gundaway nagtipon manen dagitoy dua nga imahen kalpasan ti tallo gasut ket innem a pulo a tawen ( 360 ). Naangay ngarud ti Nasantoan a Misa nga indauloan da Arsobispo Juan C. Sison ti Diocesis iti Nueva Segovia, Vigan, Ilocos Sur ken Obispo Edmundo M. Abaya ti Diocesis iti Laoag babaen ti panangilungalong da Fr. Juan R. Ballesteros, cura paroco ti Badoc ken Fr. Reymundo M. Garcia, cura parroco ti Sinait.
Agsipud ti nabara ken nagwarasen a debosion iti Naingasatan a Virgen, improklamar ti Diocesis ti Laoag nga isu ti Patron ti Ilocos Norte iti titulo a “La Virgen Milagrosa de Badoc, Puon ti Ragsakmi” idi Mayo 2, 1980 kabayatan ti pannakarambak ti Nasantoan a Eukaristia nga indauloan ni Obispo Edmundo M. Abaya.
Idi Deciembre 8, 1980, rinambakan ti probinsia ti Ilocos Norte iti pannaka-korona ti Virgen, agsipud ta ditoy Ilocos ti nagsangladanna ket isu ti mangpabaro manen ti ayat dagiti mamati ken Cristo. Tunggal Deciembre 8 nga anibersario ti pannaka-korona ni “La Virgen Milagrosa de Badoc” ket isu ti aldaw a panangbisita ken panagyaman ti entero a Diocesis kenkuana. Rambakan ti Obispo, amin a papadi, relihioso ken deboto ti nangayed a misa ket maisaruno ti “Act of Consecration of the Blessed Mary.”
