Date published: March 27-April 2, 2017
URAM
Dakkel manen a perdisyon ti gobierno iti panakauram ti plantasyon iti kaykayo a proyekto a Green Program ti DENR (Department of Environment and Natural Resources) a napasamak idiay kabanbantayan iti Brgy. Cacafean, Marcos town, Ilocos Norte idi Marso 30, 2017.
No mano ti balor iti perdisyon, haan pay masinunu-o dagiti nagresponde a kameng iti Bureau of Fire Protection ken PNP. Nalabit, agmilyon ti immuring wenno dimmapo a kaykayo no ibasar ti kalawa iti nadidigra a paset ti bantay a pattapattada ket iniktarya.
Sayang a kuarta iti gobierno ta ti pondo ket naggapu kadagiti buis nga imbaybayad dagit pada nga umili. Idi nauram ti proyekto, arigna nasayang latta metten ti buis dagiti tattao.
Tapno haanton a maulit pay ti uram iti bantay, aksidente man wenno anian ditan a rason, rumbeng a masanay koma a nalaing dagiti forest rangers. Masapul ti nasidap a panagmatmata, sensitibo a panagdengngeg ken ala-alingo wenno ala-ugsa a panag-ang-angot. Maiparit ti panagtur-og tur-og iti pansitan.
No adda man mapaneknekan a nagbasol gapu ti kinaliway iti nasao nga uram idiay Marcos town, rebbengna a mapatawanda ti tumutop a pannusa. Tay kunada iti Ingles “nobody is above the law.” #
