Published: November 21-27, 2016
Uneg iti Centennial Arena, ma-aircon ton
Naangay idi nasapa a malem iti Domingo, Nob. 20, ti pannakarambak ti tinawen a naindaklan a Cristo Rey. Dita Centennial Arena, Laoag City ti sentro iti selebration sakbay ti libot a nagturong iti St. William Cathedral.
Narikna dagiti rinibu a Catholic devotees a nagatendar ti Nasantuan Misa ken seremonia ti nakaro unay a kinapudot iti uneg ti Centennial Arena.Nakulong ngamin ti nasao a konkreto a pasdek isu’t gapuna nga awan ti pul-oy iti angin a mangpalammiis koma bassit iti uneg.
Tunggal tao a nakatugaw ken nakatakder, di agrissat nga agpalpal-id iti abaniko wenno ania man ditan a pidaso a kartolina wenno papel. Adu’t nadarepespes iti ling-et, giddanda ti uminom iti adu nga bottled mineral water tapno dida aglusdoy gapu’t darang. Inibturan dagiti tattao ti pudotna iti sumagmamano nga oras a kas parte ti sakripisioda a nakipagpaset iti Nasantuan a Misa ken seremonia iti Cristo Rey.
Nagsayaaten no matungpal ti kari ni Diputado Rudy Farinas a pa-aircon na ti uneg iti Centennial Arena babaen iti pondo nasional nga aprobaran to iti Kongreso. Naragsakan dagiti tattao idi ibitlana ti nasao a kari. Kangrunaan ngamin a sangaili ni Apo Rudy iti nasao a pasken kas napili nga Hermano Mayor ket naimatanganna a mismo ti pinagtuto-ok dagiti tattao gapu ti kinadarang ti uneg iti Centennial Arena idi Domingo.
Mainaig daytoy a banag, inbutaktak met ni Bise Gob. Angelo Barba nga addan P29 million a pondo nga inlatang ti gobierno probinsial para ti panaka-aircon ti Centennial Arena base ti provincial budget iti 2017. Napintas ngarud no agdanggay koma da Diputado Farinas ken Gob. Imee Marcos a mangipatungpal ti nasao a gannuat iti kabiitan a panawen ta daytoy a proyekto ket pagsayaatan ti amin nga umili.#
