Ababa ngem nabagas ti linaon iti balikas ni General Manager John Teodoro iti Ilocos Norte Water District idi insawangna dagitoy sumaganad bayat ti press interview na:
“Agpakpakaasiak haan laeng a dagiti konsesionario iti INWAD no di ket datayo amin. Panawenen tapno mulaantayo dagiti banbantay tayo ket haan tayo a perperdien. No ania man a vegetation ti nabati, dapat alagaantayo. Kasi ti problema talaga ket haan a diretso a danum. Ti problematayo ket ti panakaperperdi dagiti watersheds tayo. Isu a no haan tay pay laeng nga agkuti kadagitoy (a panawen), makariing tayto lattan nga awanen ti usaren tayo a danum.”
Maysa a natenneb nga eksperto maipapan ti danum ni Inheniero Teodoro. Tumutop unay ti panawaganan ti panakasaluad dagiti watersheds ken banbantayo agsipud ta umayen ti ranggas iti El Nino phenomenon kadagitoy a tiempo.
Tikag. Agringngat a pagtatalonan. Mattianan dagiti bubon. Kadagiti karkarayan, waig, dam, ken dan-aw nababa ti level iti danum. Nakapsot wenno awan pay ketdi agtedted a danum iti gripo kadagiti kabalbalayan. Kasta ti negatibo a senaryo a parnuayen ti ranggas iti El Nino phenomenon.
Serioso daytoy a phenomenon. Maseknan tayo amin. Awan ti makalisi. Uray pay dagiti babaknang. Moderno ken high-tech man ti water pump ni Apo baknang no awan met makunnotna a danum ti lansad iti daga. No awan ti apit a pagay ken natnateng, awan ti magatang a produkto para inaldaw a taraon.
Sapay koma ta haan nga agbaybay-a ti gobierno kontra El Nino. Ti gobierno isu’t pagbaybayadan ti buis dagiti tatta-o. Rumbeng laeng nga agsubad babaen ti serbisio a pagsayaatan ti kaaduan.#
