TURISMO

Editorial Logo

Date published: May 1-7, 2017

TURISMO

Dupudop ti tattao ken luglugan kadagiti pagpasiaran a disso kas ti beach resorts, beauty spots, historical landmarks ken dadduma pay a napipintas a lugar a paggugosto dagiti naruay a turista, lokal ken gangganaet.

Kasta ti senaryo ita a kalgaw a nangrugi idi Abril agpatingga ita a bulan iti Mayo. Agmawmawto manen ti gartem dagiti turista nga agpasiarpasiar inton bulan ti Hunyo a panangrugi ti tudtodo ken panagserrek dagiti ubbing nga ageskuela.

Idi un-unana a tiempo dagiti laeng addaan ti nawadwad a kuarta ti mabigbig a turista a paggugustoda ti agpasiar kadagiti tourist destinations. Ngem ita haan laengen a dagiti babaknang ti nadasar ta uray pay dagiti ordinaryo nga umili ikalikagumda metten ti aglang-ay ken agpallailang a kas turista.

Kitaentay laengen, ditoy bukodtayo a probinsya iti Ilocos Norte, mapattapatta a dandani guddua a milyon ti bilang dagiti turista nga immay nagpasiar ditoy itay napalabas a Semana Santa, segun ti opisina iti turismo ditoy Ilocos Norte.

Nakapapati man ti bilang wenno haan, dtay pagdedebatianen .

Madlaw, adu latta ti agsangpet a turista. Permi nga agganar dagiti hotels, home stay facilities, fast food restaurants, karinderya ken dadduma pay a panganan. Agpipila dagiti naruay a luglugan iti turista nga agpa-refill kadagiti gasoline stations. Kasla kutonen dagiti souvenir stalls ken shopping stores ti kaado dagiti turista. Bumanurbor ti pangen iti motorsiklo dagiti naka-leather jacket a riders a naggapu ti nadumaduma a rehion.

Dayta ti bunga iti nasantak nga industrya iti turismo. Tagibenen tay ngarud tapno agtultuloy nga agrangpaya.#

 

photo credits to Alaric Yanos/PGIN-CMO