Adu a kakailian ti nagkintayeg iti pannakapapatay ni Mayor Arsenio Agustin iti ili a Marcos, Ilocos Norte idi Sabado, June 3, 2017 bayat ti inspekyonna ti Dam Project idiay Brgy. Mabuti.
Maka-alinggaget ngamin ti wagas a pannakaisikap ti biagna. Sumagmamano a bala ti M16 Armalite Rifle ti nanggudas ti kakaisuna a biag ni apo Arsenio. Naaliaw pay ni Dingras Mayor Erdio Valenzuela, presidente iti Liga dagiti Mamayores ditoy Ilocos Norte, a nakakita ti nabawbawan a likod iti ulo ti piman a biktima idi immarayat isuna idiay Ospital nakapugsatan ti angis iti nasinged a pagayamna, segun ti media interview-na.
Napalaus ti ladladingit dagiti pamilia, kakabagyan, gagayyem ken ti sibubukel a Marcos town ti nasapa nga ipupusay ti mayorda. Nagmanto ti munisipioda ken naibaba nga half-mast pay ti bandera iti Pilipinas ti sango ti Balay iti Ili.
Kasta ti biag iti maysa a politiko. Glamoroso ngem narisko. Uray no kasano ti kinasenserona nga agserbi iti ili, syudad weno probinsya, haanto pulos makapudno. Addanto latta tumaod a parikut ken babak. Kas padatay a naiparsua a tao, addanto latta panagbiddotna bayat ti panagturayna. Awan ti perpekto a tao.
Segun ti balikas ni Senior Supt. Jose Melencio Nartatez Jr., provincial police director ditoy Ilocos Norte, ikarigatan dagiti inbestigadoresna a mangammo ti motibo iti krimen numan pay politika ken personal a susik ti immuna a kikitaenda nga anggulo a puon iti pammapatay.
Adda pay ketdin gungungona a kuarta (cash reward) a naidiaya iti siasinno man a makaited ti inpormasyon para ti panakasolbar ti kaso para ti hustisya a kalikagum a gun-oden dagiti naulila a pamilia Agustin. Sapay koma ta agari ti linak ken talna haan laeng a dita Marcos town ngem iti pay entero a probinsya.#
