Ti nalaad a rupa iti politika

Piesta dagiti politiko, lokal man ken nasional, itan ta timmapogdan iti basingkawel iti politika. Risiris nga umatipugpog ti parnuayenda bayatto ti rugi agingga ti kangitingitan iti kampania. Dinto maliklikan ti binnara ti sarsarita, pinnadakes ti kinata-o, makutkotto amin a babak iti tunggal maysa, agbibinnakaldanto ti bangsit (pudno man wenno parparbo laeng).

Ti delikado no adda agaramid ti bayolente kas panagdangran ken pammapatay, panagkigkigtot ken panagpangpangta. Adda ngamin dagiti nabibileg a politiko, pwuera de los buenos, nga agusar ti tallo a “Gs”. Iti Ingles “goons, gun and gold”.

No kunatayo nga agpiesta dagiti politiko, di bumurong nga agragrag-o met dagiti botantes. Apay? Kunayo ngata. Agsipud ta di maliklikan ti panagruar ti adu a kuarta. Aglayus ti pirak no nairot ti lablaban iti lokal. Mapasamak ti kidnaradap, aldaw man wenno rabii sakbay ti kaaldawan iti eleksyon. Labsanda dagiti agkakarruba a maibilang nga intelligent voters a di mayat ti mapaspasuksokan. Highest bidder, kuna met dagiti masirib iti agmatoon.

Kasta ti nalaad a rupa iti politika ditoy pagiliantayo. Naigamirtayon.#