Bales ti nakaparsuanna iti didigra a pinarnuay ni Bagyo Ineng ditoy Ilocos Norte ken dadduma a paset iti Amianan Luzon. Gubbuay ti kunkunada iti Ingles a Climate Change.
Kayatna a sawen a gapu’t “pannakarames” ti aglawlaw kas koma dagiti pagtatalonan, banbantay, kabakiran, karkarayan, wawaig, kurokor ken ubbog, di bumurong a bumales ti nakaparsua-an ket dusaenna dagiti tattao tapno agsagaba ti tuok ken rigat.
Saan nga asi-asi ti balor dagiti dinadael ni Bagyo Ineng a sansanikua ditoy probinsia, kukua ti gobierno man wenno pribado a tattao. Napagdadagupen a nasurok a Dua Bilyon a pesos ti gatad iti perdision. Amangan no ad-adu pay ngem dayta a kantidad.
Ania ti epektona daytoy a didigra? Ti sungbatna, nalitlitnaw pay ngem tay danum iti virgen nga ubbog. Ti didigra parnuayenna ti ad-adda pay a kinakurapay dagiti tattao.
No kas pagarigan immasenso bassit dagiti pobre a pamilia iti kallabes, itan kalpasan ti kalamidad, ad-adda nga agpobre manen agsipud ta nalayos met dagiti sansanikuada: narba ti kalapawda, nalungsot dagiti mulada a pagay ken natnateng, nalmes dagiti nuangda ken dadduma a dengwen.
Di tay ibinbinsa aminen ti kinapiman dagiti nabiktima iti bagyo. Iti naun-uneg a kapanunotan, naikari sa ketdi nga addanto latta nakukurapay iti kagimongantayo. Ngem adda met tay pagsasa-o: “Dagiti pobre isuda’t pudno nga annak ni Apo Dios”.#
