Task Force “RV”

11150621_880673841971358_180557422758406850_nSegun ti local broadcast media, binuraken ti polisia ti di pay pimmudot a trabaho ti Task Force Rudy Valdez kalpasan a naarestar dagiti a dua a masuspetsa a triggermen iti panakapapatay ni nag-bise mayor ken agdama a senior councilor Rodolfo Valdez ti Pasuquin, Ilocos Norte. Nagkemmeg dagiti dua nga agpagayam sumagmamano nga oras kalpasan ti assassination ni Apo Valdez iti imatang ti putotna a balasitang idi Abril 26, aldaw ti Domingo. Iti uneg ti karsel dita INPJ, nagtimek dagiti dua a balud ket kunada nga inosente da kano ti murder charges kontra kadakuada.

Pudno man wenno saan, kasla man nasapa unay a nalasang ti nasa-o a Task Force Rudy Valdez no maidasig kadagiti ammo ti kaaduan a task force a bungayen ti polisia. Ti gagangay, alaenna ti linawas wenno binulbulan uray pay addan naappot a suspetsa ken naakusar. Adun ti kaso iti naglabas ditoy entero a Pilipinas nga dagiti suspects wenno accused personalities ket maduktalan iti kamaudianan a “fall guys” da met gayam. Fall guys kuna tayo no riro wenno palso dagiti maatap wenno naakusar a tatta-o gapu ti krimen a dida met pudpudno nga inaramid.

Maysa pay, kas man la premature ti atap ti polisia a politika ti motibo iti panakapapatay ni Apo Rudy Valdez. No dagiti de kalibre ken natinneb nga imbestigador ti agdiskarte, liklikanda ti nasapa a panagibbat ti masiregda a motibo iti maysa a napasamak a krimen. Dida agpatingga iti maymaysa nga anggulo. Agsawarda nga agukkon iti adu nga inpormasion tapno masa-o a nasolbaren ti maysa krimen. Di tay tagtagibassiten iti sirib dagiti imbestigador ti INPPO ken Pasuquin police station agsipud ta nalalaingda. Ngem tay kunadan, awan ti perpekto a tao. No maminsan, adda latta panagriro dagiti appo nga eksperto idi pay punganay ken iti agdama.#