Susik, dispensar ken pammakawan

 

(Iluko version) Normal laeng nga aramid ti tao iti panagpadispensar maiturong ti napaluksawan a pada a tao wenno grupo iti tattao. Nalabit agpadispensar ka gapu ta nakasairka ti rikna ken panunot ti maysa nga indibidual wenno grupo.

Gaputa ammom a napaguram isuna a mabalin a mangparnuay ti susik, buriburinnaka iti konsensyam. Ti ultimo remedyo ket agpadispensarka sakbay a maladaw ti amin ket agbalattek kenka ti kunkunada a karma.

Epekto ti panagpadispensar no sinsero, natarnaw ken naimpapusoan nga awan ti namnamaem a kasubadna, malaksid ti pammakawan. Maikontra no parparawpaw laeng wenno plastik a kababalin.

Nagsayaat la ketdin no kastoy koma ti aramiden dagiti appo a politiko tayo nga agsususik gapu ti agsisimparat nga isyu ken rason a poon ti haanda a pagkikiinnawatan a mailanlandayag iti publiko babaen ti bileg iti media.

Kas koma dita ili iti Sarrat a maysa laeng nga ehemplo tayo. Nagpintas koma no agkappia da Mayor Remigio Medrano ken Bise Mayor Edito Balintona. Adda koma bumallaet a maraem a panglakayen wenno peace maker tapno marisot nga insigida ti agdama a susikda sakbay nga agramram ken dumegdeg.

Agpannuray koma ti nain-Kristiannuan a panunot ken aramid. Agpipinnakawan koma ti tunggal maysa para ti pagsayaatan ken panagdur-as ti ilida a Sarrat a nagtaudan daydi nag-Presidente Ferdinand Edralin Marcos.

Tay kunada a nain-Spirituan a pagsasa-o, ni Apo Dios ammona pay ti mangpakawan kadagiti basbasol tayo. Tuladen tay ngarud Isuna kas nangparsua kadatayo a tattao.#