Nabara nga isyu iti “no work, no pay” a polisiya nga ilunglungalong ni Diputado Toby Tiangco sadiay Kongreso iti agdama. Napintas daytoy a gannuat no maipatungpal. Segurado nga adu a kameng iti Kamara ti mangsupiat kadaytoy nangnangruna dagiti napeklan a managlangan (habitual absentees) iti kada regular ken special session iti Kongreso.
Ania ngata no adda met kastoy nga house rule “no work, no pay” nga adaptaren dagiti bukodtayo a Sangguniang Panglalawigan, Sangguniang Panglunsod ken Sangguniang Bayan ditoy Ilocos Norte? No ditay mariro, kastoy ti sistema idi tiempo iti Marcos era ti masursurot a pagannurotan seknan ti panagsueldo dagiti bokales ken konsehales.
Naruay a pada nga agbaybayad ti buwis iti mangkanunong ti “no work, no pay”a polisiya. Ngamin sayang laeng dagiti kuarta iti umili a maisuelsueldo kadakuada no dida met annongen ti trabahoda. Ti makadakes pay no adu ti managlangan tunggal session, awan kurom bulonna awan ti mataming nga agenda.
Adu nga umili ti napa-issem idi inrakurak ni Bokal Vicentito “Toto” Lazo iti SP-Ilocos Norte, a planoda ti mangadaptar ti panagmulta dagiti maladladaw a padada a bokales a sumsumrek nga agatendar ti SP session dita Kapitolyo Probinsial. Kas multa, maikis-say iti sueldoda ti tunggal maladawda a maki-session. Amin a maurnong a multa, maited a tulong kadagiti marigrigat a kakaliantayo babaen ti panangiwanwan ti provincial DSWD. Ania met ti makuna dagiti dadduma a taga-legislatibo ditoy luglugartayo?#
