Nasaem a mautob ken panunoten no kasano a napasamak ti agdindinamag nga anomaly ti biang ti opisina iti tesorera ditoy Syudad iti Laoag. Makapasidduker ti takuat ti Commission on Audit nga aganay Siam a Pulo a riwriw a pisos (P90 million) ti nagpukaw iti kaban ti gobierno iti syudad bayat ti annual audit iti libro de kuenta ti nasao nga opisina. No koma songka game, nakimar ti nasao a pirak.
Nairekord iti libro de kuenta a naideposito kampay idi amin dagitoy a kuarta iti bangko ngem daksanggasat haan met gayam a naibangko no di ket maipagarup a naibulsa usar ti peke a deposit slips ken dadduma pay a palsipikado a papeles ken dokumentos.
Seryoso a banag daytoy a panagkunniber gapu ta dakkel a bagi ti pirak ti nagpukaw manipud ti kaha iti gobierno lokal. Maibilang daytoy nga aramid a kadadakkelan a klase iti korapsyon ti pakasaritaan nga historia ti gobierno lokal iti Laoag City ken probinsya iti Ilocos Norte no di pay ket iti entero nga Ilocos Region.
No pudno ti damag basar ti takuat iti COA a sipud pay naglablabas a tawen ket nangrugi idin ti nasao nga irregularidad. Ti dakkel a saludsod: Apay awan ngata ti sigud a nakaangot ti agat ginelgel a baraniw tapno nakeltay koma nga insigida ti kunniber?
Rumbeng laeng a mausig ken mapatawan ti tumutop a pannusa ti tao wenno dagiti tattao (no kas pagarigan adda man kakunsabo) nga akin aramid ti nasao a panagkunniber. No addanto man madusa ken mabalud, nasayaat la unay tapno kasta maalay-ayan ti rikna dagiti agngarngaryet nga umili. Ngem ti biang ti gobierno iti syudad, parikutna latta no kasano a maipasublina pay ti nagpukaw a minilmilyon a kantidad a kuarta dagiti umili a natudyo a nagbaybayad ti buisda iti tinawen tawen.
Ti makadakes, awan metten ni manang tesorera iti syudd tapno lawlawaganna koma dagiti agsisipparat ken agsasamusam a saludsod. Segun kadagiti awtoridad, nagtalappuagaw isunan idiay ballasiw taaw, partikular idiay Amerika. Ngem no kas pagarigan mapan aglemmeng iti gangganaet a pagilian nga awawan ti extradition treaty iti biang iti Pilipinas, nalabit narigat a makemmeg isuna tapno maiyawid ditoy pagiliantayo. Numan pay kasta, adda met inpormasyon a dagiti nasiones nga uray awanan ti extradition treaty ket mabalin a madisponer ti presidente da ti mangi-deportar ti siasinno man a pugante a simrek iti teritoryada.#
