Ti isip, puso ken panpanunot iti kaadduan a nataengan ditoy Ilocos Norte, maibilang a maysa a bannuar ni nag-presidente Ferdinand Edralin Marcos numan pay di mailibak nga adda met dagiti sektor iti kagimongan a mangkontra kadaytoy nangnangruna dagiti intelllectuals ken scholars.
Naimbag ta adda ni Gobernador Imee Marcos a mangpaspasantak ti imahen daydi amana nga Apo Lakay. Pinutarna ti Heroes Walk dita sango ti Rizal Park a paset ti University Belt wenno ayuyang dagiti estuduantes. Dita a naimuntar ti bust monument ni Apo Ferdinand Marcos a kailirana dagiti mamaingel a bannuar a tubo iti Ilocos Norte. Rimmusingda a bannuar iti laksid nga adda latta biddot iti panakalipat kadakuada bayat ti panagtulid iti panawen.
Nalabit puntiryana nga iyadal ken ipasagipsip iti isip, puso ke panpanunot dagiti agtutubo a ni nag-presidente Marcos ket maysa a bannuar. Dayta ti gapuna a naisentro ti Marcos Fiesta (98th birth anniversary daydi Apo Lakay) ita a lawas ti celebration iti biang dagiti agtutubo manipud elementary, high schools ken kolehio.
Mayat koma no opisial a paset iti DepEd ken CHED curriculum a maiyadal kadagiti agtutubo ti kina-bannuar ni Apo Ferdinand Marcos. Kaanon to ngata? Inton agsukat ti turay? Ti agtama ket napeklan nga anti-Marcos dagiti DepEd/CHED honchos idiay Imperial Manila.#
