No amirisin iti binatog didiay balikas ni Senador Bongbong Marcos a naimaldit ken naipabuya a video idiay Sept. 11 Facebook account na kontra kenni Diputado Rodolfo Fariñas (1st distrito, Ilocos Norte) saan a nalawag no kaanoda a nagtutulag maipapan ti One Ilocos.
Simmungbat ni Fariñas: Awan kano met ti ammona a panagtutulag itay nabiit maipapan ti One Ilocos. Amangan no nabayag a tulag ti tumtumboken ti Senador. Kasla inparipirip ti Kongresista kadagiti reporters a kakadduana (agkaka-alyadona?) pay laeng ti politika dagiti Marcoses.
Ti dakkel a saludsod: Adda kadin rikki ti nagbaetan dagitoy mamaingel a politiko tayo ditoy Ilocos Norte? Wenno nakurang laeng ti lailo?
Adu’t agkuna a naragsak ti ay-ayam ti politika no agkakaddua kay amin. Awan ti oposisyon. Minus gastos, minus banbanog ken naimas pannaturog. Ngem, lugi met kano dagiti botantes. Awan ti agpakaradap. Awan ti agpasingkil. Awan ti agpakaldo ti sinanglaw. No nakitdit ti political advertisements, lugi met dagiti estasyon iti radio, telebisyon ken pagiwarnak. Negosio ti imprenta, internet shop ken tarpaulin apektado pay.
Natadem ti sirib dagiti kritiko: Kalangakang a demokrasia no awan ti makipinallot ti basingkawel iti politika. Dagiti oposisyon ti ramen ken anag iti demokrasia.#
