Rayray ni apo init

editoryal

Date published: March 20-26, 2017

Rayray ni apo init

Tiempon iti kuaresma. No kastoy a panawen iti kalgaw, nakapudpudot ti aglawlaw gapu ti rayray ni apo init. Makasinit ti kudil ti barana. Ling-et a kasta unay ti maparnuay ti bagi iti tao. No agmatu-on, mabalinmo ti aglingta iti itlog wenno agestrellado, no sumbraam ti agsarita. Dakkel a bonus pay kadagiti addaan ti kabukbukodan a solar panel system kadagiti balbalayda wenno pasdek negosyo.

      Saan met a paatiw dagiti appo a mannalon. Agguanta bilag kadagiti sinaksako nga irik, napusi a mais, bukbukel iti balatong ken utong. Ngem adda timmaud a dakkel a problema gaputa ta usarenda payen a pagbilagan dagiti paset iti national highways.

      Idi maiyuman ken ni DPWH-Ilocos Norte first district  engineer Nestor Pasion, kinuna nga adda linteg iti pagilian a mangiparit ti agbilag ti ania man a klase iti produkto agrikultura kadagiti igid ken paset iti national highways. Ti adatna, awan ti police power wenno bileg ti DPWH nga agtiliw kadagiti agsalungasing ti nasao a paglintegan isut gapuna nga impaimadan kadagiti LGUs (local government units) ti mangaramid ti ania man nga addang seknan ti problema.

       Simple met ti rason iti biang dagiti mannalon a haan nga abbeng iti trapiko no agbilagda kadagiti paset ti highways agraman provincial, city ken barangay roads. Awan ririda uray no ligayam dagiti naiyaplag a bilagda no kasta nga agsisinnabet dagiti babassit wenno dadakkel a luglugan. Awan ti dumket iti ligay (dalig wenno pilid kunada idiay Cagayan Valley ken Pangasinan) ta haan met a nabasa iti goma.

      Ditoy nga agpannuray ti kunada a “maximum tolerance”. Gapu ti kinakurang ti solar dryer a proyektos ti gobierno, pabus-oyanda lattan dagiti appo a mannalon ti kastoy nga aramid, numan pay ditay kanunongan gapu ta maikanniwas iti linteg. Nabayag daytoyen a parikut nanipud pay idi sementadon dagiti national highways ken dadduma a kalkalsada.

Agyamantay kenni Apo Dios ta awan ti mairepreport a trahedia iti aksidente ti kalkalsada a maigapu ti nasao na isyu a panagbilbilag ti produkto dagiti appo a mannalon kadagiti disso a daladal iti luglugan.#