Politika pagsisinaenna dati agkakaddua

Editorial LogoPudno a kasla ay-ayam laeng ti basingkawel iti politika. Mabalin nga agkakaddduakayo ita, inton bigat agkakalabankayo gapu iti politika. Kasta ti biag dagiti politiko. Natarnaw ti gagemda: ti agserbi kano kadagiti umili ken ti mangpadur-as ti komunidad. Kas taldiap iti naglabas a tiempo, adda dagiti nakapudno, adda met dagiti nagpalpak iti karkarida.

Kadagitoy a tiempo, nangrugin ti panagsisina dagiti sumagmamano a politiko ditoy luglugartayo. Nawatakwataken dagidi nairot a singgalotda. Naltaten dagidi kawar iti panagpapagayamda. Haandan nga aggagayyem no diket agkakabusordan iti basingkawel iti politika. Idi, nasam-it ti sarsarita nga agta-ud ti ngiwat ni apo politiko para ken ni kaalliadona a politiko ngem itan napa-it dagiti balikas a maisawsawang kontra tunggal maysa.

No maminsan, adda dakes a parnuayen ti kastoy a kinarasaw iti dila. Mabalin a makapikar, makapabain ken makatunaw ti dignidad iti maysa a tao. Liklikan koma ti kastoy nga aramid. Ngamin no adda binnara, di maliklikan ti itata-ud ti riribok a maikontra ti panagem iti Peace Covenant a nagpipinnirmaan dagiti appo a politiko.

Iti Ingles, “high-level political campaign and no hitting below the belt” koma ti agpannuray. Nagpintas la unayen no natalna, na-urnos, nalinis ken nakakapati ti eleksyon inton Mayo 9, 2016. Dayta koma ti sinario iti panagpipili nga intay ikarkararag kenni Apo Dios a Mannakabalin amin.#