Parikut iti trapiko

taInwaragawag ni SPO2 Sean Bugaoisan, hepe ti police traffic division, ti plano ti city government iti Laoag a duanton ti jeepney (mini-buses?) loading terminal ditoy syudad tapno kasta ket maalay-ayan kano ti umir-irot a trapiko ti luglugan ti sentro iti Laoag. Kinuna a maysa a proposed terminal ket dita parking lot ti laud (west wing) iti Ilocos Norte provincial capitol building ken maysa ti bakante a lote a sangnguanan iti Ilocos Norte Centennial Arena dita laud asideg ti Marcos Stadium.

Segun ti plano, amin a pampasahero a luglugan nga aggapu ken agturong ti abagatan (southbound) iti karayan wenno Gilbert Bridge agraman dagiti eastbound ket agterminal danton dita nasa-o a parking lot dita Capitolyo para loading. Dagiti met pampasahero a luglugan nga aggapu ken agturong ti amianan (northbound) ket agterminal da met dita nasa-o a bakante a lote dita sangnguanan ti Centennial.

Ti dakkel a saludsod: Masolbar ngata daytoy a “traffic scheme” ti parikut iti trapiko ti luglugan dita sentro iti Laoag City no tiempo ti rush hours kas koma ti 6:30 am-8: 30 am ken 4:30 pm-6:30 pm no aldaw iti Lunes agingga ti Viernes? Saan unay parikut ti trapiko ditoy sentro no aldaw iti Sabado ken Domingo ta awan unay ti mangopisina ken estudiantes nga agluglugan malaksid dita aglawlaw ti St. William Cathedral gapu ti nagkaadu a luglugan dagiti makimisa a Catoliko ken dagiti ordinaryo a shoppers.

Positibo ti panirigan dagiti opisiales a nangplano daytoy a sistema iti trapiko. Epektibo kano. Negatibo met ti panirigan dagiti kaadduan a communters wenno riding public. Maysa a reklamoda ket ta nagastos kano ti plete iti tricycle no agtuloy ti nasa-o a plano. Sabagay, adda met ketdi dry run iti plano tapno matingiting no epektibo wenno saan. Siputantayo.#