(ILUKO VERSION)
December 11-17, 2017 issue
Dagiti naummong a ginasgasot a drug surrenderers iti ili a San Nicolas, Ilocos Norte ti personal a kinasarang ni Papal Nuncio Gabriele Giordano Caccia bayat ti panagdar-ayna iti 400-year founding anniversary commemoration iti Independent Pueblo-San Nicolas idi Dec. 2-3, 2017.
Nagasat dagitoy a drug surrenderers ta naikkanda ti gundaway a kinasarsarita ken binendisyonanna pay ida ni Papal Nuncio. Manmano ti kasta a gundaway gapu’t napateg ti oras iti kas kenkuana a Vatican Ambassador to the Philippines a pannakabagi ni Pope Francis nga adda idiay Roma.
Nabiit pay a nagtugaw a Papal Nuncio daytoy 59-old Italian Archbishop ditoy Pilipinas a naka-base ita idiay Metro Manila. Kas paset ti aramid apostolic, damona ti rimmuar iti ka-Manilaan a nagturong iti probinsya.
Napateg ti awis kenkuana dagiti taga-Ilocos Norte nga indauluan da San Nicolas town Mayor Dr. Alfredo “Boying” Valdez Jr. ken Laoag Diocese Bishop Renato Mayugba ta pinatganna ti kiddawda iti laksid nga adu’t kumikomna a kas Vatican ambassador.
Narway a Katoliko ti timmabuno iti naindaklan a Misa nga indauluanna dita San Nicolas de Tolentino parish church, San Nicolas, Ilocos Norte ti aldaw iti Domingo, December 3. Immuna idi Sabado, December 2, maysa a nagarbo nga State Dinner ti naangay dita San Nicolas town plaza kas panangsangaili iti naisangsangayan a bisita nga inatendaran pay ni Gov. Imee Marcos.
Numan pay apagbiit laeng ti panagbisita ni Papal Nuncio ditoy luglugartayo, di bumurong a dinto pulos malipatan dagiti tattao dagiti nasantoan, nabalitokan ken nabagas a balikasna a nakasangid ti puso, rikna ken panunot tapno ad-adda pay nga umasidegtayo iti sidong ni Apo Dios a Namarsua.#
