Date Published: April 10-16, 2017
PANAGTUTORPOS
Tiempo ti graduation wenno panagtutorpos dagiti nadumaduma a pagadalan iti entero a Pilipinas ita a bulan iti Abril. Recognition program laeng kadagiti adda ti nababa a tukad. Dagiti onibersidad ken kolehio ti adda graduation wenno panagturpos a seremonyana tapno pormal nga iyawatda dagiti diploma ken medalya a simbolo ti naan-anay a nagun-odda a balligi iti kangatuan a tukad iti edukasyon, four-year course, doctorate ken master’s degree.
Ditoy bukod tay a probinsya iti Ilocos Norte, agsisimparat iti estorya dagiti graduates iti balligi wenno success stories nga inburayda kadagiti padada nga agtutubo. Adda dagiti agkasingin a babbalasang a nagturpos nga agpada a cum laude.
Adda cum laude a nagraduar iti laksid a nakurapay ti pamiliana. Adda nagturpos iti criminology nga estudiante babaen ti panangisakad ti amana a mannalon nga adda ti rangkap iti bagina, partikular, naiyanak nga awan ti dua a sakana.
Dagiti tallo a nadakamat iti ngato nga ehemplo iti balligi ket isu ti mangipasimudaag ti kinapateg ti edukasyon. Agpapada iti rason no apay nga ingaedda ti nagbasa, nagturpos iti kolehio ken nanggun-od ti propesyon: Tapno matulonganda ti pamiliada wenno maiya-onda iti kinakurapay.
Iti biang dagiti nagannak daytoy met ti nabalitokan a balikasda: Ti edukasyon wenno adal isu laeng ti mabalin nga indaipatawid kadagiti annakda, tawid a haanto pulos mapukaw iti tungpal biagda.#
