Date Published: April 3-9, 2017
PANAGTAMBANG
Nadara ti napasamak nga ambos kontra ti bunggoy ni Bise Mayor Jessie Ermitaño ti Marcos town, Ilocos Norte idi rabii iti Martes, April 4,2017. Atapen dagiti kapolisan a politika ti motibo iti panagtambang a ti kangrunaanna a putirya ket ti Bise Mayor.
Nagasat ti opisyal ta damgis laeng ti sinagabana a tama iti paltog. Haanna pay a tiempo ti tumangad iti barsanga. Naladingit ta pimmusay ti dryberna ken nasugatan ti staff-na ken ti bodyguard na. Permi a natatek ti bala iti SUV Fortuner a nagluganan ti bunggoyna ngem nasiglat ni apo Ermitaño ta nakipinnaltog isuna kadagiti kriminal bulon metten ti panag-atras dagiti suspek a naglibas.
Apay a puntiryada nga isikap koma ti biag iti opisyal? Ania kadi ti kinatao ni apo Ermitaño? Alisto ngamin ti panaglatakna a kas politiko. Nammuan dagiti taga-media a nag-buy and sell iti animales isuna sakbay a simrek ti lubong iti politika.
Nangrugi a naaweng ti naganna idi nagbalin nga ABC president iti Marcos town. Kalpasanna, nabotosan a bise mayor a sinyales ti kina-popular na kadagiti kakailianna. Natibker ti pammati ni apo Bise Mayor a politika ken dakes nga apal ti rason no apay a kayatda kiltayen ti biagna.
Narugit ti ay-ayam iti politika ditoy pagiliantayo no maidasig kadagiti dadakkel ken nadur-as a nasyones. Narasaw ti panagdildilada ken agdedebati ti paglaengan dagiti gangganaet a politiko ngem datayo ditoy Pilipinas sabali ta uray no sitsitik a politiko makaibtor a mangdangran ken pumatay ti kabusorna a politiko. Nagbalinen a paset ti kultura ti dadduma a Pilipino ti kasta a dakes a kababalin. Ditay koma tultoladen.
Ita a tiempo ti Semana Santa, tumutop la unay ti intay panagdawat ti pammakawan ti basbasoltayo, sublianantayo ti maka-Dios nga aramid ket itakwil tayo ti sulisog iti demonyo.#
